कोकणातला शिमगोत्सव म्हणजे विविध वैशिष्ट्यपूर्ण पद्धती, परंपरा, लोककला यांचा आविष्कार असतो. फाक पंचमी म्हणजेच फाल्गुन शुद्ध पंचमीपासून साधारणतः गुढीपाडव्यापर्यंत हा उत्सव मोठ्या उत्साहाने साजरा केला जातो. कोकणात शिमग्याचे महत्त्व आणि उत्साह दिवाळीपेक्षा किती तरी अधिक. बाहेरगावी असलेले चाकरमानीही हमखास शिमगोत्सवासाठी गावी येतात. ग्रामदेवतेच्या पालख्या गावागावांत फिरत असतात आणि सगळीकडे एक वेगळेच जल्लोषाचे वातावरण असते. या पालख्या का नाचवतात? कशा नाचवतात? होळी कशी आणतात? गावागावातल्या वेगवेगळ्या प्रथा-परंपरा कशा असतात, अशा प्रश्नांची उत्तरं मिळण्यासाठी पाहा रत्नागिरीच्या लांजा तालुक्यातल्या शिमग्याचा सोबतचा व्हिडिओ...
बहीण-भावांची भेट म्हणजेच दोन गावांच्या पालख्यांची भेट हादेखील या शिमगोत्सवातील एक अनोखा सोहळा. गावागावातल्या एकोप्याचे प्रतीक असलेल्या हा सोहळा रत्नागिरी तालुक्यातल्या कुरतडे गावी होतो. पालखीभेटीच्या सोहळ्याचा माहितीपूर्ण व्हिडिओ सोबत देत आहोत.
